सफलताका लागि धैर्य र  निरन्तरता जरुरी 

नारी संवाददाता

वैशाख २५, २०७६

सानैदेखि आफ्नै काम गर्नुपर्छ भनेर सोच राख्ने कृपा श्रेष्ठले ११ कक्षामा पढ्दा नै कम्पनी दर्ता गरी काम काम गर्न थालिन् । प्लस टु पछि १–२ जना साथीहरूबाहेक सबै जना विदेश पढ्न गए । सम्भवतः कृपाले त्यतिबेला काम नगरेकी भए उनी पनि साथीहरूजस्तै बिदेसिन्थिन् होला तर आफ्नै व्यवसाय सुरु गरिसकेकाले उनी त्यो मोहमा परिनन् । उनका बुवाको प्रेसको छुट्टै व्यवसाय थियो तर कृपालाई पारिवारिक काममा संलग्न हुन मन लागेन । जे गर्छु, आफै गर्छु भन्ने उनको स्वभाव नै उनको सफलताको रहस्य हो । बुवाको निधन भएपछि भने उनी दुवै व्यवसायलाई मर्ज गर्न बाध्य भइन् ।

सानो उमेरमै धेरै जिम्मेवारी बहन गर्नुपर्‍यो । कृपाको सप्लाई सपोर्टले अमेरिका, जर्मन, अस्ट्रेलिया, फ्रान्स, जापानमा आफ्ना उत्पादन निर्यात गर्छ । सप्लाई सपोर्टको टिसर्ट र क्याप बढी रुचाइन्छ भने मग, बोतल, ब्याग, हुडी, मफलर, खादा आदि सामान स्वदेश तथा विदेश दुबैतिर रुचाइन्छ । उनी मुख्यतः आफ्नो सामानको गुणस्तर तथा युनिक पिसका लागि लागिपर्छिन् । अहिले उनले ५० जना युवालाई काम दिइरहेकी छिन् । एक दशकको अनुभवमा उनले ग्राहकको माया र विश्वास बटुलेकी छिन् ।

आफ्नो देशमा जस्तो काम गर्न सजिलो अरु देशमा हुँदैन भन्दै कृपा भन्छिन्–यहाँ धेरै आराम छ, बाहिर सेकेन्ड–सेकेन्डको गणना गरी काम गर्नुपर्छ । म आफै काम गरिरहेकीले होला म अरुको अन्डरमा बसेर काम गर्ने सक्दिन । नेपालमा बजार सानो भएकाले पनि काम गर्न सजिलो छ । म विदेशमा बसेका साथीहरूलाई नियाल्छु, मेसिनजस्तै जिन्दगी, यहाँ त परिवारसँगै बसेर आरामसँग काम गर्ने वातावरण छ तर मेहनत भने गर्नुपर्छ । कामै नगरी नेपालमा केही छैन भन्नु गलत हो ।

नेपालमा के–कस्ता स्कोप छन्

सुन्तला, एलोबेरा, अमला, हर्बस, रिठा आदि हर्बलहरूका ब्युटी प्रोडक्ट क्वालिटी मेन्टेन गरेर लो भोलुममा बनाउन सकिन्छ । अहिले सबैले अर्गानिक र हर्बल सामग्री खोज्छन् । त्यस्तै बेड एन्ड ब्रेकफास्टलगायत धेरै कुरा छन् । टेक्निक भयो र मेहनत गर्‍यो भने जे पनि चल्छ । बजार सानो छ तर मार्केट लिन सजिलो छ । नेपालमा मेहनतै नगरी क्लिकका भरमा रिजल्ट खोज्छन् । व्यापार व्यवसायमा धैर्य चाहिन्छ । सफलताका लागि निरन्तरता जरुरी छ ।

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्