तेस्रो पिंकाथन काठमाडौंमा

सिर्जना दुवाल श्रेष्ठ

फाल्गुन १०, २०७५

महिलाको स्वास्थ्य अवस्थाप्रति उनीहरूलाई सचेत गराउने उद्देश्यले आयोजना हुँदै आएको पिंकाथन काठमाडौंको तेस्रो संस्करण आगामी भोलि फागुन ११ गते संचालन हुने भएको छ । नेपालकै सबैभन्दा ठूलो यो महिला दौडमा पाँच हजार महिला सहभागी हुने अपेक्षा गरिएको छ ।

बलिउडका सुपर मोडल मिलिन्द सोमनको लोककल्याणकारी संस्था युनाइटेड सिस्टर्स फाउन्डेसनले महिलामा हुने स्तन क्यान्सरविरुद्ध जनचेतना जगाउने उद्देश्यले भारतका विभिन्न ८ सहरमा यो दौड संचालन गर्दै आएकोमा तीन वर्षदेखि अन्तर्राष्ट्रिय संस्करणका रूपमा काठमाडौंमा समेत गर्न थालिएको हो । यो ‘फ्रेन्चाइज’ पिंकाथनलाई लिजर पोर्ट नेपालले नेपाल भित्र्याएको हो । गत वर्ष पिंकाथन नेपालको सद्भावना दूत नगमा श्रेष्ठ थिइन् । यसपटक पिंकाथनको सद्भावना दूतमा नीति शाहलाई नियुक्त गरिएको छ ।

नीति शाह, सद्भावना दूत, पिंकाथन २०१९ पिंकाथनको जानकारी कहिलेदेखि थियो ?

दुई वर्षअघि नेपालमा पिंकाथन सुरु भएको थियो । त्यो भन्दा अघिका वर्षहरूमा भारतमा हुने पिंकाथनका बारेमा पनि मलाई जानकारी छ । खेलकुदका माध्यमबाट महिलाको स्तन क्यान्सरविरुद्ध जनचेतना वृद्धि गर्ने उद्देश्यले पिंकाथन आयोजित गरिएका कारण पनि म यसमा सहभागी भएकी हुँ ।

पहिले पनि पिंकाथनमा सहभागी हुनुभएको थियो ?

गत वर्ष सहभागीका रूपमा दौडिएकी थिएँ । यसपटक भने सद्भावना दूतका रूपमा सुरुदेखि नै आबद्ध हुने भएकी छु । 

सद्भावना दूतका रूपमा तपाईंको भूमिका के–कस्तो रहन्छ ?

यो मेरा लागि एकदमै राम्रो अवसर हो । हजारौं महिला सहभागी हुने पिंकाथनमा बढीभन्दा बढीलाई सहभागी गराउँदै महिलाहरूको स्वास्थ्य एवं स्तन क्यान्सरविरुद्ध जनचेतना फैलाउने काम आफmैमा निकै सकारात्मक छ । 

कार्यक्रमका बारेमा बताइदिनुहोस् न ?

यो कार्यत्रम फागुन ११ गते बिहान ६.३० मा प्रारम्भ हुनेछ । चार वटा विधामा हुने यो प्रतिस्पर्धाका क्रममा दौडका साथ महिला फिटनेस एवं स्वास्थ्यका लागि जनचेतनात्मक कार्यक्रमसमेत हुनेछ ।

कान्छीमाया कोजू, म्याराथन धावक यसपटक पिंकाथनमा सहभागी हुने सोच छ ?

अहिले म बिरामी छु । तैपनि त्यतिबेलासम्म निको भयो भने हाफ म्याराथन, ५ किलो मिटर तथा १० किलो मिटरमध्ये एउटामा भए पनि सहभागी हुने सोच छ । 

पिंकाथनका बारेमा कहिले जानकारी पाउनुभयो ?

५–६ वर्षअघिदेखि इन्टरनेटमार्फत पिंकाथनका बारेमा जानकारी थियो । महिलाहरूको ब्रेस्ट क्यान्सरका लागि चलाइएको क्याम्पेन भएकाले म ती सबै दौड हेर्थें । यस्तो पिंकाथन नेपालमा पनि हुनुपर्छ भन्ने त्यतिबेलै लाग्थ्यो । 

अन्य दौड र पिंकाथनमा दौडदा के–कस्तो फरक महसुस गर्नुभयो ?

एकदमै फरक लाग्यो । पहिलो पिंकाथन रंगशालाबाट सुरु भएको थियो । मैले अहिलेसम्म धेरै प्रतिस्पर्धामा भाग लिएँ तर त्यो दिनजस्तो रमाइलो कहिल्यै भएन । महिलाहरूका लागि मात्र भएकाले पनि यो विशेष दौड लाग्यो । नेपालमा यसरी यति धेरै महिला एक ठाउँमा जम्मा भएर दौडिएको त्यो पहिलो दौड थियो । हामी खेलाडीका साथमा सेलिब्रेटी, विभिन्न क्षेत्रका महिलाहरू, टिनएजर सबै सहभागी हुने पिंकाथन ब्रेस्ट क्यान्सरको जनचेतनात्मक अभियान भएकाले पनि यसमा दौडदा बेग्लै आनन्द महसुस हुन्छ । 

पिंकाथनको माध्यमबाट के सन्देश दिन चाहनुहुन्छ ?

महिलाहरूले घरभित्रको व्यस्तताका कारण आफ्नो स्वास्थ्यप्रति ध्यान दिएको पाइँदैन । यद्यपि हरेक महिलालाई आफ्नो स्वास्थ्यस्थितिका सम्बन्धमा राम्रो ज्ञान हुनुपर्छ । डाक्टरकहाँ गएर समय र पैसा खर्च गर्दा आफ्नो स्वास्थ्यमा ध्यान पुर्‍याउनुपर्छ । त्यसमध्ये पनि दौड सबैभन्दा राम्रो एक्सरसाइज हो । म त भन्छु, स्वास्थ्यका लागि दौड सबैभन्दा बेस्ट हो । 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्