Teej banner

सबैकी प्रिय एलेन डिजेनेरस

विभु लुइटेल

असार ११, २०७५

 

पूर्वअमेरिकी राष्ट्रपति बाराक ओबामाले चर्चित अमेरिकी टिभी सिटकम ‘द एलेन सो’ मा कार्यक्रम सञ्चालक एलेनको प्रशंसामा केही शब्द खर्च गरे । अमेरिकी राष्ट्रपतिद्वारा कुनै नागरिकलाई उत्कृष्ट कार्य गरेबापत् दिइने स्वतन्त्रता पदकबाट पनि उनको सम्मान गरियो । उक्त सम्मान कार्यक्रममा ओबामाले मुक्तकण्ठले एलेनको प्रशंसा गरेका थिए जसलाई सुनेर त्यहाँ उपस्थित सबै भावविह्वल भए ।

आखिर को हुन् त एलेन डिजेनेरस ? किन संसारभरका करोडौं मानिस उनलाई रुचाउँछन् ? अंग्रेजी टिभी शोमा चाख राख्नेहरूका लागि एलेन डिजेनेरस पक्कै नौलो नाम होइन । विश्वभर छरिएर रहेका उनका प्रशंसक उनको कार्यक्रम हेरेर पेट मिचिमिची हाँस्छन् अनि आँखा मिचिमिची रुन्छन् पनि ।

‘द एलेन सो’ मा सेलिब्रेटी र आममानिस अतिथिका रूपमा उपस्थित हुन्छन् । उनीहरूसँग विभिन्न विषयमा केन्द्रित भएर कुराकानी गरिन्छ अनि त्यहाँ उनीहरूका सफलताका कथा सुनिन्छ । उनीहरूका दु:ख र संघर्षका दिनका बारेमा छलफल हुन्छ । केही वर्षअघि टालिया क्यास्टिलानो नाम गरेकी १३ वर्षीया मेकअप आर्टिस्टलाई उक्त कार्यक्रममा अतिथिका रूपमा बोलाइएको थियो । ल्युकेमियाको अन्तिम चरणमा रहेकी टालियासँग जीवनका नाममा निकै कम समय बाँकी थियो । त्यति कम उमेरमा उनले जीवनमा भोगिसकेको त्यत्रो चुनौतीलाई संसारसामु चिनाउन एलेनले निर्वाह गरेको भूमिका निकै प्रशंसनीय रह्यो । हामी आफ्नो जीवनलाई गम्भीरतापूर्वक लिँदैनौं तर १३ वर्षकी टालियाको जीवनलाई हेर्ने दृष्टिकोणले सिंगो संसारलाई नै भावविह्वल तुल्याइदियो ।

एलेनको कार्यक्रममा एकपछि अर्को हृदयविदारक कथा आइरहन्छ । यस्तै अर्का बालक टेइट एन्डर्सनको कथाले पनि सिंगो विश्वलाई नै भावुक बनायो । मुटुको बायाँ भेन्ट्रिकलबिना जन्मिएका एन्डर्सनको बाल्यकाल निकै कष्टपूर्ण थियो । नाजुक आर्थिक अवस्थाका कारण उनको शल्यक्रिया पनि हुन पाइरहेको थिएन । एलेनको सोमा आइसकेपछि उनको जीवनले अर्कै मोड लियो । शल्यक्रियाका लागि उनले आवश्यक आर्थिक सहयोग त पाए नै, त्यसका अतिरिक्त थुप्रै सहयोग उनलाई प्राप्त भयो । अहिले उनी स्वस्थ छन् र सामान्य बालकझैँ जीवन गुजारिरहेका छन् ।

एलेन समलिंगी महिला हुन् । यसको खुलासा उनले सन् १९९७ मा गरिन् । उनको लैंगिक अभिविन्यासका बारेमा थुपै्र सञ्चारमाध्यमले आ–आफ्नै शैलीमा आ–आफ्नै कुरा गरे । त्यतिबेला अमेरिकामा अहिलेको जस्तो उदार सोच थिएन । धेरैले एलेनको उक्त कदमको भत्र्सना पनि गरे । त्यसले उनको करियरलाई ठूलै धक्का दियो । एक समय त उनी डिप्रेसनको सिकारसमेत हुन पुगिन् । सन् २००८ सम्म पनि अमेरिकी राज्य क्यालिफोर्नियामा समलिंगी विवाह गैरकानुनी मानिन्थ्यो । यसले कानुनी मान्यता प्राप्त गरेलगत्तै एलेन आफ्नी प्रेमिका पोर्सा डि रोसीसँग विवाह बन्धनमा बाँधिइन् । अमेरिकी राष्ट्रपति बाराक ओबामाले खुलेर एलेनको साहसको प्रशंसा गरे । पोर्साले २००८ मा पासपोर्टमा आफ्नो नाम पोर्सा ली जेम्स डिजेनेरस राख्न पाऊँ भनी हालेको आवेदनको सुनुवाइ करिब अढाइ वर्षपछि मात्र भयो ।

एलेन संसारकै प्रिय व्यक्ति हुन् । डेढ दशकभन्दा बढी चलिसकेको उनको सोमा उनी मायाको सही परिभाषा दिन्छिन्, सबैलाई एक–अर्काप्रति मायाको दृष्टिले हेर्न सिकाउँछिन् । यो कार्यक्रमका हरेक एपिसोडले केही न केही सकारात्मक सन्देश दिइरहेकै हुन्छन् । प्रत्येक एपिसोडको अन्त्यमा एलेन दोहोर्‍याउँछिन्, ‘बि काइन्ड टु वान अनदर’ ।

 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्