बेडरुम

नारी संवाददाता

भाद्र २१, २०७४ 

सरिता श्रेष्ठ, इन्टेरियर डिजाइनर

सुत्ने कोठा नितान्त व्यक्तिगत स्थान हो जहाँ सम्पूर्ण आराम प्राप्त हुन्छ । मानिसहरू जब बेडरुममा पुग्छन् तब उनीहरू तनावमुक्त हुन्छन् । सजिलो तथा सौम्य महसुस गर्छन् । तसर्थ बेडरुम डिजाइनरहरूको सदैव एउटै प्रयास हुन्छ कि यस्तो डिजाइन दिन सकियोस् जहाँ हरेक व्यक्ति एवं परिवारले सहज महसुस गर्न सकून् । यहाँ आराम, खुसी र सुखको अनुभूति होस् । यो स्थान राम्रोसँग डेकोरेटेड गरिएको होस् ।

बालबालिकाहरूको कोठा रंगरोगन गर्दा प्राकृतिक कलामा ध्यान पुर्‍याउनुपर्छ ।

छोराको कोठा रातो–नीलोले रंगाउनुपर्छ भने छोरीको कोठामा पिंक वा सेतो रंग लगाउनुपर्छ । कोठा राम्रो वातावरणले गुञ्जायमान हुनुपर्छ । कुनै पनि हालतमा अस्तव्यस्त देखिनु हुँदैन । भुलेर पनि बेडरुमलाई ब्राइट कलरले रंगाउनु हुँदैन । २ वा ३ वटाभन्दा बढी सेड प्रयोग गर्नुहुँदैन । बेडरुमलाई फ्लेक्जिबल बनाउन बालबालिकाको शारीरिक बनावटसँग मिल्ने फर्निचर राख्नुपर्छ ।  

आधुनिक विज्ञानले समेत प्रमाणित गरेको छ कि वयस्कले भन्दा बालबालिकाले सजिलै बोर महसुस गर्छन् । किनभने उनीहरूको मस्तिष्कले चाँडै कुनै पनि डिजाइन गर्छ । उनीहरूको रुचिअनुसार तुरुन्तै फर्निचर बदल्न सकिँदैन तसर्थ छोरा वा छोरीका लागि छुट्टै प्रकारको बेड, ओछ्यान, तकिया र त्यससँग मिल्ने वालपेपर टाँस्न सकिन्छ । पढ्ने वातावरणका लागि पुस्तक, चार्टस, खेलौना आदि जरुरी हुन्छन् जसले गर्दा उनीहरू रमाइलोसँग पढ्छन् र खेल्छन् ।

बालबालिकाहरूको कोठामा विभिन्न तस्बिर वा तयारी अवस्थाका तस्बिरहरू लगाएर विभिन्न किसिमको साइजमा टंगाउनुपर्छ । कोठाको भित्ता एवं फ्लोरमा शीतलता दिने खालका चिटिक्क परेका सेरामिक्स टायल, मार्बल्स वा ग्रिनाइट वा लेमिनेटेड फ्लोर काठ वा कार्पेट ओछ्याउनुपर्छ ।

चिल्ड्रेन रुम

बालबालिकाहरूको कोठामा स्टोरेजको व्यवस्थाका साथै पढ्न र इन्डोर गेम्स खेल्न पर्याप्त खुला ठाउँ हुनुपर्छ । बालबालिकाहरूको बेडमुनि दराज हुनुपर्छ जसले गर्दा उनीहरूलाई आफ्ना सरसामान निकाल्न असुविधा हुँदैन । स्टडी टेबलका साथमा एउटा क्लिप बोर्ड हुनुपर्छ, जहाँ बोर्ड पिनको सहायताले आवश्यक कागजात राख्न सकियोस् । बालबालिका साना भए कोठामा आकर्षक डिजाइनयुक्त प्लास्टिक कन्टेनर राख्नुपर्छ, यसमा उनीहरूका खेलौना सम्हालेर राख्न सकिन्छ । बालबालिकाहरूको कोठालाई आकर्षक बनाउन भित्तामा फ्लावरी वा कार्टुन क्यारेक्टरयुक्त वालपेपर लगाउनुपर्छ । भित्तामा थ्रिडी स्टिकर्स, कार्टुन पोस्टरहरू टाँगेर पनि कोठालाई नयाँ लुक दिन सकिन्छ । बालबालिकाहरूको कोठाका लागि पर्दा, बेडसिट, पिलो कभर आदि छनोट गर्दा उनीहरूको रोजाइअनुसार कार्टुन क्यारेक्टर, फूल, पुतली आदि प्रिन्ट्सलाई प्राथमिकता दिन सकिन्छ ।

बेडरुमको मेकओभर

बेडरुमको मेकओभरले मुड बदल्न सहयोग गर्छ । सबैभन्दा पहिले बेडसिट, पिलो कभर तथा पर्दा बदल्नुपर्छ । त्यसपछि केही क्षणमै बेडरुमको लुक बदल्न सकिन्छ । बेडरुमलाई आवश्यकतानुसार कुनै पनि थिममा सजाउन सकिन्छ । बेडरुमका लागि फ्लोरल प्रिन्ट छनोट गर्नु उपयुक्त हुन्छ । बेडरुमलाई ताजा फूलले सजाउन सकिन्छ वा अरू कुनै थिम छनोट गर्न पनि सकिन्छ । बेडरुमलाई रोमान्टिक लुक दिन क्यान्डल, ल्याम्प वा अलग–अलग प्रकारका सफ्ट लाइट्स प्रयोग गर्नुपर्छ ।

बेडरुमलाई लग्जरियस लुक प्रदान गर्न सिल्कका पर्दा, बेडसिट, पिलो कभर आदि उपयुक्त हुन्छन् । बेडरुमका लागि त्यस्तो साइड टेबल छनोट गर्नुपर्छ, जसको तल्लो भागमा दैनिक आवश्यकताका स–साना सामग्री राख्ने पर्याप्त ठाउँ होस् ।

 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्