साइनोसाइटिस (पिनास) बाट जोगिने उपाय

सरस्वती कटुवाल

श्रावण ५, २०७४

–गर्मी मौसममा मानिसहरू पानीमा रुझ्ने, चर्को घाममा हिँड्ने, घामबाट हिँडेर तुरुन्त चिसोमा बस्ने, पसिना नओभाउँदै स्नान गर्ने, चिसो पेय पदार्थ पिउने आदि काम गर्छन् ।

–यस्ता क्रियाकलापले गर्दा सर्दी लाग्ने, ज्वरो आउने, नाकबाट पानी बग्ने, टाउको दुख्ने, आँखा रातो हुने, पटक–पटक हाच्छिउँ आउने, दुर्गन्धयुक्त कफ तथा श्वास निस्कने आदि हुन्छ जुन साइनसको लक्षण हो र यो रोगले लामो समयसम्म सताउँछ ।

–साइनसबाट बच्न धूलो, धूवाँ एवं बढी घामपछि चिसोबाट जोगिनुपर्छ ।

–मैदाका परिकार, मसलेदार पिरो खाना, फास्टफुड (तयारी भोजन…), चिसो पेयपदार्थ (कोल्ड ड्रिङ्क), चिया, कफी, तारेको, धूम्रपान, नशालु पेयपदार्थ यो रोगका लागि निषेध छन् ।

–यो रोगले यदि दीर्घकालदेखि सताएको छ भने मेरुदण्ड, पेट र अनुहारमा बिहान शुद्ध तेलले मालिस गर्ने । तीन दिनसम्म कागती र मह मनतातो पानीमा मिसाएर दिनहुँ २ घन्टाको अन्तरमा पिउने । समय–समयमा सुप खाने । मौसमअनुसारका फलफूल दिने, तीन दिनपछि एक हप्तासम्म हल्का भोजन दिने अर्थात् चोकरयुक्त खाना, मौसमअनुरूपको तरकारी दिने अनि त्यसको हप्तामा एकदिन उपवास बस्ने । कागती, पानी, मह, सुप, फलफूल आदि खाने क्रममा एनिमा दिने ।

–सूर्यभेदी, नाडीशोधन, भस्त्रिका, प्रणव प्राणायाम, सूर्य नमस्कार, सर्वाङ्गासन, मत्स्यासन आदि व्यायाम गरी जलनेती तथा रबरनेती लिँदा अत्यन्त फाइदा हुन्छ ।

–तुलसी पानी, गुर्जा पानी तथा अदुवाको रसमा मह मिसाएर खाने । तुलसी तथा अदुवाको रसमा गोलमरिच र मिस्री मिसाएर दिनमा २–३ पटक पिउने । राति सुत्नुअघि नाकमा २–२ थोपा शुद्ध गाईको घिउ वा बदाम रोगन तेल हालेर सुत्ने ।

रीता कार्की, योगगुरु

हेल्दी एण्ड फ्रेस जीवन

–चाँडै सुत्ने तथा चाँडै उठ्ने बानी स्वास्थ्यका दृष्टिले अत्यन्तै लाभदायक हुन्छ । भनिन्छ–सुन्दर बिहानीले दिनलाई नै सुन्दर र फ्रेस बनाइदिन्छ । राति चाँडै सुत्ने र बिहान चाँडै उठ्ने बानीले मानिस स्वस्थ हुन्छ ।

–बिहान कम्तीमा ३० मिनेट योग गर्नाले शरीर स्वस्थ रहन्छ । योग नियमित गर्नु आवश्यक हुन्छ । योगले रोग टाढा भाग्छ ।

–दैनिक चिसो पानीले नुहाउँदा राति मीठो निद्रा पर्छ । दैनिक अफिस जाने मानिसले चिसो पानीले नुहाउँदा उसको दैनिकी नै ताजा हुन्छ । चिसो पानीले नुहाउनाले रोग प्रतिरोधात्मक क्षमता पनि वृद्धि हुन्छ ।

–खानासँग नियमित रूपमा दही खाए अनुहारको चमक कायम रहने मात्र होइन अधिकांश रोगको उपचार पनि हुन्छ । नियमित दही खानाले धेरै प्रकारका तनाबबाट पनि मुक्ति मिल्छ ।

–लामो समयसम्म बस्नु पनि राम्रो होइन । यदि आठ घन्टा लामो समय बसेर काम गर्नु छ भने टाउकोमा असर पर्छ । त्यसैले समय–समयमा उठेर दुई–चार पाइला हिँड्नु राम्रो हो ।

–हेल्दी र फ्रेस शरीरका लागि साथी बनाउनु पनि आवश्यक हुन्छ । कामले गर्दा मानिसमा स्ट्रेसको मात्र बढ्नु स्वाभाविक हो । यस्तो बेलामा आफ्नो मिल्ने साथीसँग कुरा सेयर गर्दा फ्रेस अनुभूति हुन्छ ।

–कम खाने र बढी पिउने मानिस स्वस्थ रहन सक्छ । चिकित्सकहरूका अनुसार धेरै खाना खानु बेफाइदाजनक छ । दैनिक खानामा बढी लिक्विड फुड हुनु फाइदाजनक हुन्छ ।

 

 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्