जीवनको आधार मामु

सिर्जना दुवाल श्रेष्ठ

वैशाख २६, २०७४ 

विपश्यना खनाल क्षेत्री, विद्यार्थी तथा कोरियोग्राफर

आमा : मोहन्ना खनाल क्षेत्री, शिक्षिका तथा इभेन्ट म्यानेजर

घरमा पिल्लरको आवश्यकता भएजस्तै सबैको जीवनमा आमाको महत्व हुन्छ । त्यस्तै मेरो जीवनमा पनि मामु घरको जग, पिल्लर, डन्डी, सिमेन्ट सबै हुनुहुन्छ । मैले मामुबाटै सधै अघि बढ्नुपर्छ, पछि फर्केर हेर्नुहुँदैन भन्ने कुरा सिकें । जीवनमा उज्याला र अँध्यारा मोडहरू आउँछन् तर विचलित हुनुहुँदैन भन्ने कुरा पनि मैले उहाँबाट सुन्दै आएकी छु ।

 

मामुले मलाई बाल्यावस्थादेखि अहिलेसम्म हरेक कुरामा हौसला दिँदै आउनुभएको छ । नयाँ–नयाँ कुरा सिकाउनुका साथै सिक्ने प्रेरणा दिनुहुन्छ । मेरी मामु दिनभरि स्कुलमा काम गर्नुहुन्छ र बिदाको उपयोग गर्दै विभिन्न इभेन्ट पनि संचालन गर्दै आउनुभएको छ । मैले ७–८ कक्षा पढ्दादेखि नै मामुका प्रोग्रामहरूमा एसिस्टेन्ट कोरियोग्राफरका रूपमा काम गर्दै आएकी छु । मेरी मामु सधैं चुप लागेर बस्नु हुँदैन, केही न केही गरिरहनुपर्छ भन्नुहुन्छ । हरेक कुरामा फ्रि छोडे पनि पढाइमा भने कडा हुनुहुन्छ । जीवनमा पढाइविना केही हुँदैन भनेर पढ्नमा बढी जोड दिनुहुन्छ । टिनएज धेरै साथी हुने समय हो, तर मेरो जीवनमा मामु नै मेरो वेस्ट फ्रेन्ड हुनुहुन्छ । फुर्सदमा पनि म मामुसँगै घुम्न जान्छु । रेस्टुराँ जाने, फिल्म हेर्ने, कन्सर्टतिर जानेदेखि समाजसेवातिर पनि म मामुसँगै हुन्छु ।

 

महिनामा एक–दुई दिन मामुले मेरै लागि समय छुट्याउनुहुन्छ । ममा केही गर्नसक्छु भन्ने आँट पनि उहाँले गर्दा नै आएको हो । जति व्यस्त जीवन भए पनि उहाँ मेरो स्वास्थ्य, सौन्दर्य एवं करियरमा सधै चासो राख्नुहुन्छ । मामुकै कारण ममा असल व्यक्ति भएर बाँच्ने चाहना पलाएको हो । 

 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्