ह्विलचियरको सहारामा खेल्ने बास्केटबल खेलाडी यामी

नारी संवाददाता

चैत्र २९, २०७३  

यामी झाँक्री, ह्विलचियर (बास्केटबल खेलाडी)

११ कक्षामा पढ्दापढ्दै ढाडको मेरुदण्डमा ट्युमर देखिएर अप्रेसन गराएपछि उनी उठ्न तथा हिँड्न नसक्ने भइन् । प्यूठानमा जन्मिएर उतै पढिरहेकी यामी त्यही रोगकै कारण काठमाडौं आएकी हुन् । वीर अस्पतालमा अप्रेसन असफल भएपछि उनले जीवन नै रोकिएको मान्न थालिन् । ह्विलचियरको सहारामा हिँड्न थालेकी यामीका लागि ४ वर्षजति सारै कठिन भयो । उपचारका क्रममा जोरपाटीको पुनस्र्थापना केन्द्रमा बस्न थालेकी यामीले त्यहाँ बस्ने साथीहरूकै हौसला एवं प्रेरणाका कारण काठमाडौंमै बस्ने निर्णय लिइन् । त्यहाँ आफूजस्ता धेरै मानिस देखेर आफूमा आत्मविश्वास बढेको उनी बताउँछिन् ।

 

यामी आफूजस्ता ह्विलचियरमा हिँड्नेहरूले बास्केटबल खेलेको देखेर सुरुमा त अचम्मित भइन् । पछि आफू पनि खेल्न सक्छु भन्ने आँटका कारण उनले बास्केटबल खेल्न थालेकी हुन् । केही वर्ष क्याप्टेनको जिम्मेवारीसमेत सम्हालेकी यामीले अरु पनि क्याप्टेन हुनुपर्छ भन्ने सोचका कारण अहिले क्याप्टेनको जिम्मेवारी छोडेर खेलाडीका रूपमा बास्केटबल खेलिरहेकी छिन् । अहिले नेपालमा ४–५ वटा ह्विलचियर बास्केटबल टिम छन् । त्यसमा यामीकै टिम अग्रणी छ । प्राय: खेलमा यामीकै टिम विजयी भैरहेको हुन्छ । उक्त टिममा यामी र ज्योति अर्यालले टिमलाई बलियो बनाउन महत्वपूर्ण भूमिका निर्वाह गरिरहेका छन्।

 

मैदानमा खेल्न पुग्दा आफू अपाङ्ग छु, उठ्न र हिँड्न सक्दिन जस्ता कमजोर मानसिकता हराउने अनुभव उनको छ । पोखरा, धरान आदि ठाउँमा सम्पन्न ह्विलचियर बास्केटबलमा प्रथम स्थान हासिल गरेकी यामी ब्याचलर सकेर आय आर्जनका लागि बागबजारस्थित हार्दिक होटलमा सहायक एकाउन्टेनको काम पनि सम्हालिरहेकी छिन् । २८ वर्षकी यामी इलेक्ट्रिक काम गर्ने श्रीमान्को साथ, सहयोग एवं हौसलाले काम र खेललाई सँगसँगै लान सकिरहेको बताउँछिन् । हिँडेर, दगुरिरहेको व्यक्ति अचानक ह्विलचियरको सहायतामा हिँड्नुपर्दा नरमाइलो लागे पनि अहिले उनी यसैमा खुसी छिन् । मानिसमा विद्यमान साँघुरो मानसिकता हटाउन सके शारीरिक रूपमा अशक्त व्यक्ति पनि उदाहरणीय बन्न सक्ने यामी बताउँछिन् । 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्