रमेको जोडी

खोटाङमा जन्मिएर काठमाडौंमै हुर्किएकी बेनुका गायिकाका रूपमा आफूलाई चिनाउँदैछिन् । पर्खाइ तथा सा.. द फस्ट नोट गरी दुई एल्बम सार्वजनिक गरिसकेकी बेनुका गीत–संगीतमा पुन: सक्रिय हुने तयारी गर्दैछिन् ।

सिर्जना दुवाल श्रेष्ठ

चैत्र २६, २०७३ 

 

 

दाम्पत्य जीवन सुखमय हुन एकले अर्काको काममा सपोर्ट एवं माया गर्नुपर्ने सोच राख्छन् कलाकार दयाहाङ राई तथा गायिका बेनुका राई दम्पती । दयाहाङकै भाषामा भन्ने हो भने अहिले उनको करियरको ऊर्जाशील समय हो । बेनुका जीवनसाथी भएकैले आजको सफलता हात लागेको भन्न कन्जुस्याईं नगर्ने राई उनीजस्तो ऊर्जावान् श्रीमती पाएकोमा आफूलाई भाग्यशाली मान्छन् । बेनुकाको सकारात्मक साथले नै रंगमञ्चदेखि चलचित्रसम्म खुलेर जम्न पाएको दया बताउँछन् ।

विवाहअघि दुवै जना आ–आफ्नो काममा संघर्ष गरिरहेका थिए । त्यतिबेला काम खोज्न व्यस्त हुने समय थियो भने विवाहपछि कामले खोज्न थालेको समय भएको छ । सिनेमा, थिएटर, ग्रुप सबै विवाहपछि नै जुरेको हो । भोजपुरका दयाहाङले रंगमञ्चसँगै चलचित्रमा स्थापित भएर नायकको छवि बनाए । खोटाङमा जन्मिएर काठमाडौंमै हुर्किएकी बेनुका आफूलाई गायिकाका रूपमा  चिनाउँदैछिन् । दुई एल्बम सार्वजनिक गरिसकेकी बेनुका गीत–संगीतमा पुन: सक्रिय हुने तयारी गर्दैछिन् । 

 

राई दम्पती परिचय भएदेखि नै सँगसँगै हुन्थे । साहित्य, कला एवं संगीतको यो पारखी जोडीले कहिल्यै आफू यतिविधि लोकप्रिय भइएला, नामदाम कमाइएला भन्ने कल्पना गरेको थिएन । बिहान घरबाट निस्किएपछि उनीहरू दिनभरि सँगै हुन्थे । गाडी चढे घर छिटै पुगिएला भनेर शंखमूलमा बसोबास गर्ने दयाहाङ बेनुकालाई सातदोबाटो पुर्‍याएर घर पुग्थे । उनीहरूको संगत साहित्य एवं संगीतका अग्रज कलाकारहरूसँग भयो । त्यसैले पनि उनीहरू त्यही सरसंगतमै रमाउँथे । साथीका रूपमा अघि बढिरहेका यी दुईमा एक–अर्काप्रति प्रेम भावना त थियो तर मौनतामा सीमित । एकदिन बाटो हिँड्ने क्रममा दयाहाङले बेनुका म तिमीलाई धोका दिँदैछु भने ।

 

धोका शब्द सुनेर बेनुका एकछिन अल्मलिइन् पनि । प्रेम प्रस्ताव राख्छन् होला भन्ने सोचेकी बेनुकाले धोकाका बारेमा प्रतिप्रश्न गर्दा दयाहाङले आफ्नै पारामा भने–तिमीले मलाई साथीका रूपमा लिएकी हौली तर मैले त्यो भन्दा बढी नै सोचेको छु र तिमीले मैले जस्तो सोचेकी छ्यौ त्यस्तो पनि नहुनसक्छ । त्यसपछि बेनुका मात्र मुसुक्क हाँसेर पछि भेटौं है भन्दै आफ्नो बाटो लागिन् । पर्सिपल्ट भेट्दा बेनुकाले विस्तारै दयाहाङको हात समातेपछि यो जोडीको प्रेम अघि बढ्यो । 

 

दयाहाङ रंगमञ्चमा करियर बनाउँदै थिए भने बेनुका गायनमा । त्यतिबेला दयाको उमेर २२ वर्ष तथा बेनुकाको उमेर १९ वर्ष थियो । त्यो उमेरमा पनि उनीहरू पार्क तथा सिनेमा हलमा डेटिङका लागि गएनन् । उनीहरूको डेटिङ स्पट भन्नु नै पुस्तक विमोचन, क्यासेट विमोचन, साहित्यिक कार्यक्रम तथा पुस्तकालयहरू हुन्थे । सरल र शालीन यो जोडीको भविष्यको कुनै ठोस योजना छैन । विवाहपछि दयाको करियर रफ्तारमा दगुर्‍यो भने बेनुकाको गायन सुस्त भयो । यो कुरामा दयालाई नरमाइलो लाग्छ । आफूभन्दा पहिले नै स्थापित भएकी गायिका विवाहपछि अल्मलिएकोमा उनी खिन्न पनि छन् । बेनुका भने घर, परिवार एवं छोराछोरीको रेखदेख तथा श्रीमान्को प्रगतिमा दंग पर्दै जीवन बिताइरहेकी छिन् । त्यसो भन्दैमा उनको गायन यात्रा ठप्प भएको भने होइन । 

 

समय–समयमा कार्यक्रम तथा गीत रेकर्ड गराइरहेकी बेनुका संगीतमा स्नातकोत्तर गर्दैछिन् । बाहिरी कामबाट थाकेर वा रिसाएर घर फर्कदा श्रीमतीले तानपुरा वा हार्माेनियममा गीत गाइरहेको सुन्दा आनन्द मान्छन् दयाहाङ । उनलाई बेनुकाले गाएको कहाँ–कहाँ पुगिन् म, तिम्रो लागि र जोगेयाको फेरिले गीत सारै मन पर्छन् । उता बेनुका भने महिलाहरू विवाहपछि अल्मलिने अनुभव सुनाउँछिन् । आफू गायनमा सक्रिय हुन नसक्नुमा श्रीमान् सफल हुँदै गएपछि आफू त्यसैमा रमाउँदै गएको र त्यस क्रममा आफ्नै बाटो भुलेको उनको तर्क छ ।

 

हरेक पल उनकै राम्रो भैदिए हुन्थ्यो भन्ने सोच आउने बेनुका बताउँछिन् । अचेल एकदमै व्यस्त सेडुअलमा हिँडिरहेका दयालाई अब भने श्रीमतीले पनि आफ्नो प्रतिभालाई समय दिए हुन्थ्यो भन्ने लाग्न थालेको छ । त्यसैले पनि बेनुका अध्ययन पूरा गर्नासाथ संगीतको यात्रामा अनवरत लाग्ने तयारीमा छिन् । आफ्ना श्रीमान्मा संगीतको सेन्स भए पनि उनलाई सुर र तालको ज्ञान भने नभएको बेनुकाले बताइन् । 

बेनुकाको राम्रो पक्ष 

मेरो कामलाई एकदमै बुझ्ने र काम गर्ने वातावरण तयार पारिदिने । मेरो काम, परिवार, छोरा र साथमा आफ्नो गायनलाई पनि साथै लाने क्षमता । ठूलो सपना नलिने, जे छ त्यसमै सन्तुष्ट हुने स्वभाव । कहिल्यै किचकिच नगर्ने । 

 

बेनुकाको कमजोडी

परिवार, घर र मेरो काममा व्यस्त हुने तर आफ्नो 

प्रतिभालाई त्यति ध्यान नदिने ।

दयाहाङको राम्रो पक्ष

जतिसुकै व्यस्त भए पनि परिवारप्रतिको 

जिम्मेवारीबाट पछि नहट्ने, सकारात्मक 

सोच तथा मिजासिलो स्वभाव ।

दयाहाङको कमजोडी

प्रेसर लिएर काम गर्ने । आफूले नसक्दा वा समय नहुँदा पनि नाइँ भन्न नसक्ने । ज्यानले धानेसम्म काम गरिरहने । 

उनको मनपर्ने चलचित्र

कबड्डी–कबड्डीमा गरेको अभिनय नेचुरल छ । 

ह्वाइट सनको कामका लागि म उहाँलाई स्यालुट नै गर्छु । त्यसमा उहाँको अभिनय सारै लोभलाग्दो छ ।

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्