सिर्जनशील व्यवसायमा नयाँ पुस्ता

सिर्जना दुवाल श्रेष्ठ

माघ २४, २०७३ 

आफ्ना सन्तान डाक्टर, इन्जिनियर वा पाइलट बनून् भन्ने चाहना राख्ने अभिभावक आज पनि थुप्रै छन् । यद्यपि अहिले नयाँ पुस्ताको विकास, शिक्षाको स्तर तथा केही नयाँ काम गरौं भन्ने चाहना राख्ने युवाहरूका कारण पुरातन सोच राख्ने अभिभावकको विचारमा समेत परिवर्तन देखा पर्न थालेको छ । युवाहरूको सक्रियता एवं रुचि नयाँ–नयाँ विषयमा छ । अहिलेका युवाहरू फेसन डिजाइनिङ, मेकअप आर्ट, इन्टेरियर डिजाइनिङ, बार टेन्डर, कुक, नर्स, सिए, ग्राफिक्स डिजाइनिङ, एमिनेसन आदि विविध क्षेत्रमा सक्रिय हुन थालेका छन् ।

 

जुनसुकै क्षेत्र वा पेसामा लागे पनि सिर्जनशीलता छ भने नाम, दाम एवं सन्तुष्टि प्राप्त हुने भएकाले पहिलेजस्तो डाक्टर, इन्जिनियर वा पाइलट नै बन्नुपर्छ भन्ने आमधारणामा कमी आउँदै गएको छ । आजको पुस्ता पुरातन पेसाभन्दा फरक काम गरी नाम तथा दाम कमाउने कुरामा विश्वास गर्छ ।

 

आयुषा श्रेष्ठ

केयूबाट ग्राफिक्स डिजाइनिङ गरेकी आयुषालाई सानैदेखि आर्टमा सक्रिय हुने चाहना थियो । त्यतिबेला सेरामिक्सका सिर्जनात्मक सामग्री हातैले बनाएर घर सजाउने आयुषा अहिले कन्सेप्चल ज्वेलरी डिजाइनिङमा सक्रिय छिन् । पाटन, वसन्तपुरतिर घुम्न जाँदा पर्यटकहरूलाई नेपाली गहना बेचेको देख्दा आफूले पनि केही नयाँ गहना बनाउने हो कि भनेर सोच्ने आयुषाले अध्ययनपछि यसैमा लाग्ने निर्णय गरिन् । सुरुमा घरपरिवारले नरुचाए पनि

 

आफ्नो काम र मेहनत देखेपछि प्रोत्साहित गर्न थालिएको आयुषा बताउँछिन् । आयुषालाई सुरुमा कालीगढबाट विश्वास प्राप्त गर्न मुस्किल भयो । उनले तयार पारेका ज्वेलरी डिजाइन युवापुस्तामाझ मात्र होइन प्लस ५० सम्मले पनि उत्तिकै रुचाएका छन् । अरु गहनाभन्दा फरक देखिने भएकाले पनि आयुषाको आमु ब्रान्डको मेड इन नेपाल ज्वेलरीको माग बढ्दो छ । 

 

उनले बनाएका चन्द्र, सूर्य लकेट अत्यधिक रुचाइएको डिजाइन हो । आयुषाले डिजाइन गरेका इयररिङ, नेकलेस, रिङ, ब्रासलेट तथा चुराहरू निकै आकर्षक छन् । ती ज्वेलरीको २ हजार २ सयदेखि ७–८ हजारसम्म पर्छ । चाँदीमा गोल्ड प्लेटेड गरिएको उनको काम इन्स्टाग्रामबाटै बढी बिक्री भैरहेको छ । अहिले केयूमै डिजाइनिङ पढाइरहेकी आयुषा अबको पुस्ता यस्तै क्रिएटिभ कामतर्फ आकर्षित हुने अनुमान गर्छिन् ।

 

आस्था राजभण्डारी

आयुषाजस्तै क्रियटिभ व्यवसायमा लागेकी अर्की युवती हुन्, आस्था राजभण्डारी । रातो बंगला स्कुलमा पढेकी आस्थाले भारतबाट आइभी गरेकी हुन् । त्यतिबेला डिजाइनिङ टेक्नोलोजी लिएर पढेकी आयुषाले पछि पुनेबाट इन्डस्ट्री डिजाइनको ४ वर्षे कोर्स पूरा गरिन् । अध्ययन पूरा भैसकेपछि नेपालमै केही नयाँ काम गरौं भनेर नेपाली बजारको रिसर्च गरेकी आस्थाले डिजाइन, आर्ट तथा टेक्नोलोजी तीनवटा विधालाई ब्लेन्ड गरेर कला काठमाडौं नामक फर्म चलाइरहेकी छिन् । उक्त फर्ममा क्रिएटिभ डाइरेक्टरका रूपमा कार्यरत आस्था कम्प्युटरबाट डिजाइन गरी मेसिनबाट इन्टेरियर डिजाइनका सामग्रीहरू तयार पार्छिन् ।

 

उनले डिजाइन गरेका चिया राख्ने कोस्टर, घडी, ल्याम्प, शोपिस, झ्याल–ढोकादेखि फल्स सिलिङसम्मका सामग्री अनलाइनमार्फत बिक्री भैरहेका छन् । उनका डिजाइनहरू सेरामिक्स र काठबाट तयार पारिएका हुन्छन् । आस्था आफ्नो डिजाइन कन्टेम्प्रोरी डिजाइन भएकाले सानो गिफ्ट आइटमदेखि इन्टेरियरलाई फोकस गरी काम गरिरहेको बताउँछिन् । 

 

 

 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्