सम्बन्धमा मधुरता

नारी संवाददाता

मंसिर १३, २०७३  

प्रेमलाई अनुभूतिका रूपमा लिइन्छ तर विवाहपछि प्रेम अनुभूति मात्र रहँदैन, हामी जुन कुरालाई दैनिक जीवनमा अपनाउँछौं, जसबाट जीवनसाथीलाई खुसी, सन्तुष्टि, नयाँपन प्राप्त हुन्छ त्यही नै प्रेम हो । जुन समय सबै कुरा ठीक तरिकाले अघि बढिरहेको हुँदैन, तब प्रेमपूर्ण पहल मजबुत हुनुपर्छ । केही हटेर नयाँ परीक्षण गर्नुपर्छ । विशेष अवसरमा धेरैजसोले आफ्ना श्रीमान्लाई उपहार पनि दिन्छन् ।

 

दैनिक रूपमा गरिने एकै प्रकारको कुराले दिक्क बनाउँछ । त्यसैले त्यस्तो अवस्थामा केही अलग काम गर्नुपर्छ । प्रेम विवाह हो भने श्रीमान्सँग सोध्नुहोस्, परिवारले सहज रूपमा विवाहका लागि स्वीकृति नदिएको भए ? विवाह नभएको भए, तपार्इं के गर्नुहुन्थ्यो ? के तपाईं मबिना रहन सक्नुहुन्थ्यो ? यी प्रश्नले उनलाई आश्चर्यमा पार्नेछ, कुराकानीमा नयाँपन आउँछ । यसैगरी आफ्ना राम्रा र रोमाञ्चक स्मृतिको सम्झना गरेर ताजापन महसुस गर्न सकिन्छ । दुवैजना कामकाजी हुनुहुन्छ भने अफिसमा फुर्सद प्राप्त भए एक–अर्कालाई फोन गर्नुपर्छ । विवाहपूर्व जसरी फोनमा कुराकानी हुन्थ्यो, त्यही प्रक्रियालाई दोहोर्‍याएर आपसी सम्बन्धमा तापाजन छर्न सकिन्छ ।

 

ठूला र महँगा रेस्टुराँमा क्यान्डल लाइट डिनरको साटो सानो रेस्टुराँमा खाना खाएर पनि आनन्द लिन सकिन्छ । कहिलेकाहीँ श्रीमान्का लागि शृंगार गरेर बस्नुहोस्, यो सरप्राइज पक्कै पनि उनलाई मन पर्नेछ । पार्टी र विशेष अवसरका लागि त सधैँ सजिइन्छ तर मात्र श्रीमान्का लागि कुनै दिन सजिएर उनका साथ रहनुहोस्, उनको नजर तपार्इंबाट पक्कै हट्नेछैन ।

 

यी सबै कुरा गरेर पनि आपसी सम्बन्धमा कटुता उत्पन्न भएको छ भने सबै कुरा एकैपटक एकदम ठीक हुन्छ भन्ने छैन । यसका लागि समय लाग्छ । प्रयास जारी राख्नुपर्छ, धैर्य छोड्नु हुँदैन । सम्बन्धमा मिठास ल्याउन समय, निरन्तरता र प्लानिङ चाहिन्छ किनभने सबै कुरा आफैं हुँदैन । विस्तारै कदम बढाउनुपर्छ, त्यसपछि मात्र फरक अनुभव गर्न सकिन्छ ।

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्