दशैंमा युवा

- झरना नहर्की, सिर्जना दुवाल श्रेष्ठ

आश्विन २०, २०७२

दशैंमा युवा

दशैंको विविध अर्थ छ। दशैंलाई सबै जातजातिले आ–आफ्नै तरिकाले मनाउँछन्। दशैंको आगमनसँगै हरेक नेपालीको घरमा खुसीको लहर छाउँछ । दशैंको महत्व विविध भएकाले नै यो ठूलो चाड भएको हो। परम्परागत रूपमा मनाइँदै आएको दशैंले असत्यमाथि सत्यको विजय भएको दिनको उद्घोष गर्छ। युवाहरूका लागि यो रमाइलो पर्व हो । लामो छुट्टी हुने भएकाले उनीहरू साथीभाइसँग घुम्ने योजना बनाउँछन्। संस्कृतिको जगेर्ना गर्दै यसको मर्मलाई जीवन्त राख्नुपर्ने युवाहरूको जोड छ। दसंैको रमाइलोले सबैमा उमंग ल्याउँछ । ग्याजेट तथा प्रविधिको नजिक रहन चाहने युवाहरू त्यसको माध्यमबाट संस्कृति जोगाउन पनि पछि छैनन् । उनीहरू आफ्नो परिवारले मनाएको दसैंलाई आफ्नै अर्थले प्राथमिकतामा राख्छन् । सबैको दशैंलाई नियाल्ने दृष्टिकोण फरक भए पनि सबैले यसको साध्यलाई आत्मसात् गरेका छन् । दशैंमा हरेक युवाको निधारमा टीका तथा जमराले पनि यही कुराको संकेत गर्छ ।  युवाका लागि दशैं छुट, सेल तथा नयाँ पहिरन प्रयोग गर्ने अवसर पनि हो। दशैंमा विभिन्न संघसंस्थाले विभिन्न कार्यक्रम आयोजना गर्छन् जहाँ युवाहरूको उल्लेख्य सहभागिता हुन्छ ।

दिलाशा श्रेष्ठ

म सानैदेखि दसैंमा रमाउँछु । दसैं भन्नासाथ टीका लगाएपछि पाइने दक्षिणाको सम्झना आउँछ । यो साथीहरूसँग घुम्ने, फिल्म हेर्न जाने, सपिङ गर्ने, आफूलाई मेन्टेन गर्ने समय पनि हो । अष्टमीका दिन घरमा गरिने कुमारी पूजा पनि मलाई निकै मन पर्छ । यतिबेला दिमागमा दबाब हुँदैन, न पढाइको प्रेसर, न घरमा पढ–पढ, छिटो उठ भन्ने दबाब ? आफ्नै तालमा उठ्यो, साथीहरूसँग मिलेर विभिन्न देवी मन्दिरहरूमा गएर दर्शन गर्ने,  मामाघरमा गएर मामा–माइजू, भाइ–बहिनीसँग चंगा, भिडियो गेम तथा तास खेल्ने मौका पनि यही हो । दसैं घरको इन्टेरियर चेन्ज गर्ने राम्रो समय पनि भएकाले म ममीसँग मिलेर केही न केही नयाँ गरिरहन्छु । म दसैंको लामो छुट्टीमा रिल्याक्स गर्छु । म यो समयलाई आफ्नो सौन्दर्य एवं फिटनेसका लागि पनि प्रयोग गर्छु । दसैंको लुगा अलि विशेष होस् भन्ने लाग्छ । दसैं पारिवारिक सम्बन्ध सुमधुर बनाउने चाड हो भने टाढाटाढाका आफन्तहरूबाट आशीर्वाद लिन पाउनु यसको अर्को राम्रो पक्ष हो ।   

विभा शाक्य

दसैं आउनासाथ मनैदेखि उत्साह बढेर आउँछ । नियमित स्कूल, गृहकार्य आदिबाट थकित भैरहेका बेला लामो समय बिदा हुने दसैं रिल्याक्सको चाडजस्तो पनि लाग्छ । दसैंमा रमाइलो मौसम, फूलहरूको मीठो वासना एवं मठ–मन्दिरमा पूजापाठ हुने भएकाले यो अरू पर्वभन्दा महत्वपूर्ण लाग्छ । म बौद्ध धर्मावलम्वी भए पनि दसैंमा खुबै रमाउँछु । बिदा भएपछि होमवर्क सकेर दसैंको रमाइलोमा सरिक हुन्छु । इखाछेंका साथीहरूसँग मिलेर बंगलामुखी, महालक्ष्मीथानमा भगवतीको दर्शन गर्न पुग्छु । साथीहरूसँग पिङ खेल्न जान्छु । बुबासँग अंकलहरूको घरमा गएर चंगा उडाउँछु र घरमा मीठा–मीठा परिकारहरू बनाएर खान्छु । बुबाले दसैंमा बहिनी र मलाई नयाँ लुगा किनिदिनुहुन्छ । अरु बेला किनेको भन्दा दसैंमा किनेको लुगाको महत्व बढी हुन्छ । वर्ष दिनमा दसैं नै एउटा यस्तो समय हो जहाँ मन फुकाएर घुम्न, खान तथा खेल्न पाइन्छ ।

अहिंसा श्रेष्ठ, विद्यार्थी

दसंैमा मौसमले पनि  साथ दिन्छ । बाहिर हिँड्दा अर्कै प्रकारको रमाइलो अनुभव हुन्छ । पारिजातले यो मौसमलाई सुवासित बनाउँछ । टाढा रहेका आफन्त पनि दसैंमा घर फर्कन्छन् । परिवारका सबै सदस्य एक ठाउँ भेला भएर आफ्नो सुख–दु:ख साटासाट गर्छन् । दसैंले सबैमा अपनत्वको भावना उत्पन्न गराउँछ । सानाले ठूलाबाट आशीर्वाद पाउने ठूलाले सानाबाट आदर पाउने सद्भावको चाड पनि हो दसंै ।  मलाई दसंैमा नयाँ लुगा तथा घुमघाम राम्रो लाग्छ । नौरथा लागेपछि  म आमासँग पूजाआजामा सरिक हुन्छु । दसंैका मीठा परिकारले मलाई लोभ्याउँछन् । बाल्यकालदेखि नै आकाशमा चंगा उडेको देखेपछि मन निकै रमाउँथ्यो । दसंैमा पिङमा मच्चिन पनि निकै रमाइलो लाग्छ । समग्रमा भन्नुपर्दा दसंै हामी नेपालीहरूलाई एक सूत्रमा बाँध्ने चाड हो । यसले हरेकको मनमा उमंग तथा उत्साह पैदा गराउँछ । वर्षभरि कामले थाकेकाहरूले एक हप्ता रमाइलो गरी आफूलाई रिचार्ज गर्छन् । वर्ष दिनमा आउने दसंैले हामीलाई सत्यको मार्गमा लाग्न प्रेरणा दिन्छ ।

परिसी कारञ्जित, कलंकी

दसंै असत्यमाथि सत्यको विजय भएको दिन हो । दसंै हरेक पक्षले रमणीय पर्व हो । यतिबेला सबैजना आफ्ना दु:ख–वेदना भुलेर केवल रमाइलो गर्नेतर्फ आकर्षित हुन्छन् । केही दिन भए पनि सबैले आफ्ना दु:ख भुल्छन् । दसंैका सबै दिनको आ–आफ्नै महत्व छ । दसंैले विविध विशेषता लिएर आउँछ । दसंै मेरा लागि परिवारका सबै सदस्य एकसाथ बसेर रमाइलो गरी मनाइने पर्व भएकाले पनि महत्वपूर्ण छ । दसंैका बेला म घर वरिपरि सरसफाइ गर्छु, नयाँ बिरुवा रोप्छु । यतिबेला काम पनि गर्न मनलाग्छ । दसंैको पहेंलो जमरा तथा रातो टीका मलाई निकै मनपर्छ । दसंै सकिँदै जाँदा नरमाइलो अनुभव हुन्छ । फेरि एक वर्ष यो महान् पर्वले छोडेर बिदा भएकोमा मलाई निकै खल्लो लाग्छ । 

तपाईको प्रतिक्रिया

कमेन्टको लागि यहाँ click गर्नुहोस्

फेसबूक कमेन्ट गर्नुहोस्

फेसबूक छैन? यो फारम प्रयोग गर्नुहोस्