दम्पती

नदीजस्तै असीम र दीपाञ्जलीको यात्रा

मंगोल परिवारमा जन्मिएकी दीपाञ्जली लामा तथा इस्लामिक समुदायका असीम शाह वैवाहिक सम्बन्धमा बाँधिएको १२ वर्ष पूरा भैसकेको छ । उनीहरूको विवाहको समयतिर धेरैले जात, धर्म केही नमिल्ने, त्यसमाथि मुस्लिमसँगको यो विवाह असफल हुने अनुमान गरेका थिए । एक दशकअघिसम्म पनि नेपाली समाज यति उदार भैसकेको थिएन । यसरी अन्तरजातीय  विवाहलाई सामान्य रूपमा स्वीकार गर्ने परिवेश पनि थिएन । दीपाञ्जली कान्तिपुर टेलिभिजनमा भिजे थिइन् भने असीम शाह नेपाल वान टेलिभिजनका प्रोग्राम प्रोडुसर थिए । त्यो समयमा दीपाञ्जली भिजे, म्युजिक भिडियो, मोडलिङ, टेली सिरियल आदिमा व्यस्त थिइन् । असीम उनको कामको प्रशंसक थिए । असीमको एउटा बाल कार्यक्रममा दीपाञ्जलीका भाइ भिजे थिए । यद्यपि दीपाञ्जली र असीमबीच परिचय भैसकेको थिएन । आमा र भाइ भने असीम र आशिफ दुवै दाजु–भाइका प्रशंसक थिए । एकदिन भाइको कार्यक्रम सकिने समय कुरिरहँदा असीम उनीसँग बोल्न आए । भाइलाई समय लाग्ने भएकाले उनीहरू दुवै कफी पिउन गए । असीमलाई पहिलो भेटमै दीपाञ्जली मन परिसकेकी थिइन् । उनको मनको घण्टी बजेर यही केटीसँग विवाह गर्छु भन्नेसम्म लाग्यो । केही दिनपछि उनीहरूको दोस्रो भेट भयो । दोस्रो भेट हुनासाथ असीमले विवाहको प्रस्ताव राखे । दीपाञ्जलीले तुरुन्तै नाइँ भन्दै न जात मिल्छ, न धर्म कसरी हाम्रो विवाह सम्भव छ भनेर त्यहाँबाट हिँडिन् । विवाहको प्रस्ताव अस्वीकार गरे पनि उनीहरूको भेट भने भैरहन्थ्यो । एउटा भेटमा असीमले मैले तिम्री ममीलाई मनाएँ भने विवाह गर्ने हो भनेर सोधेपछि दीपाञ्जलीले मुस्कुराउँदै स्वीकृति दिइन् । त्यतिबेला दीपाञ्जलीकी ममी मरिससमा थिइन् । इमेल तथा फोनमार्फत छोरीसँग विवाह गर्ने प्रस्ताव राख्दा ममी त्यसमा राजी भइन् । हुन त दीपाञ्जली असीमको कन्फिडेन्ट र कामप्रतिको लगाबबाट सुरुका दिनदेखि नै प्रभावित थिइन् । असीमलाई भने आफ्नो घरमा मनाउन त्यति गार्‍हो भएन । आफ्नी आमा पौडेलकी छोरी भएकीले पनि असीमको कन्फिडेन्ट दर्‍हो थियो । विवाह हुनुभन्दा ६ महिनाअघि दीपाञ्जलीले कान्तिपुर टेलिभिजनलगायत मोडलिङका सबै काम छोडिन् । असीमले नछोडभन्दा पनि दीपाञ्जलीले विवाहपछिको जिम्मेवारी, बेग्लै धर्म–संस्कृतिसँग गर्नुपर्ने समायोजना आदि कुरा बुझेर करियरलाई केही समय विश्राम दिइन् । लामाले मुस्लिम समुदाय, धर्म, रहनसहन तथा खानपानलाई नजिकबाट नियाल्दै आफैंलाई त्यसमा ढाल्दै गइन् । उनलाई लाग्थ्यो, विवाह पुरुष र महिलाको मात्र सम्बन्ध होइन, पूरै परिवार र समुदायको सम्बन्ध पनि हो । विवाह हुनुअघि र अहिलेसम्म पनि श्रीमान्ले आफूलाई असीम माया गरेकै कारण जस्तोसुकै परिस्थिति पनि सहज बन्दै गएको दीपाञ्जली बताउँछिन् । केही समयपछि उनी इमेजमा काम गर्न थालिन् ।दीपाञ्जलीको काम गर्ने, छोड्ने उनको आफ्नै निर्णय हो । यसमा कसैको दबाब थिएन । भूकम्पपछिको ३ वर्ष उनी पूरै गृहिणी भएर बसिन्, तर त्यो अवधिमा उनले धार्मिक कोर्स (इस्लामिक स्टडी) मा ४० कोर्स पूरा गरिन् । यसरी भिन्न जात, धर्मबाट आएकी जीवनसाथीले आफ्नो धर्म–संस्कृतिलाई सम्मान गरेको देख्दा असीमलाई अचम्म लाग्छ । त्यति मात्र होइन उक्त कोर्सपछि दीपाञ्जलीको टाउकोबाट हिजाब कहिल्यै हटेको छैन । यसरी घर, परिवार, धर्म एवं संस्कृतिलाई अत्यन्त महत्व दिने श्रीमती पाएकोमा आफ्नो छनोट सही भएको मानेर असीम आफैं दंग पर्छन् ।श्रीमान्–श्रीमतीभन्दा मिल्ने साथीका रूपमा देखिने यो दम्पतीलाई एक–अर्काप्रति कुनै गुनासो छैन । असीम श्रीमतीकै साथ र प्रोत्साहनका कारण जीवनमा सफलता मिल्दै गएको बताउँछन् । असीमका केही म्युजिक भिडियोको कोरियोग्राफीसमेत गरेकी दीपाञ्जलीले श्रीमान्को कामको व्याक सपोर्टरका रूपमा समेत साथ दिइरहेकी छिन् । चलचित्रका पात्र छनोटदेखि नयाँ चलचित्र डामाडोलको शीर्षक पनि दीपाञ्जलीले नै जुराएकी हुन् । दीपाञ्जली लामो समयपछि कान्तिपुर टिभी र एफएममार्फत काममा फर्किएकी छिन् । उनको यो निर्णयमा असीम मात्र होइन परिवार नै खुसी छ । १२ वर्षको यात्रामा उनीहरूबीच कुनै ठाकठुकसम्म परेको छैन । विवाहलाई पवित्र बन्धनका रूपमा लिने शाह दम्पती आपसी माया र प्रेरणाकै बलमा अघि बढिरहेका छन् । दीपाञ्जली भन्छिन्–हाम्रो यो सुमधुर सम्बन्धमा कसैको नजर नलागोस् ।दीपाञ्जली असीमको सबैभन्दा मनपर्ने पक्ष ?म उनका हरेक कामबाट प्रभावित छु । जति काम गर्दा पनि उनमा थकान देख्दिनँ । उत्साह, उमंग र कामप्रति रुचि पाउँछु । तपाईंको काममा असीमको सपोर्ट कत्तिको छ ?एकदमै सपोर्ट छ । यो अतिथि भएन, यस्तो प्रश्न सोध्नुपर्छ भन्नेदेखि लिएर ड्रेस सेन्स अनि प्रस्तुतिमा समेत उनी प्रतिक्रिया गरिरहन्छन् ।धर्मनै परिवर्तन गर्नुपर्दा कस्तो अनुभव भयो ?मेरो घरमा पनि ममी हिन्दू र बुवा बुद्धिष्ट हुनुहुन्थ्यो । त्यसैले पनि धर्म नै परिवर्तन गर्नुपर्‍यो भन्ने कुनै गुनासो छैन । इस्लामिक धर्म अलि फरक भएकाले केही गार्‍हो त भयो । भाषा, संस्कृति, खानपानदेखि सबै फरक, तर सासू आमाले सबै कुरा राम्रोसँग सिकाउनु, बुझाउनु भयो । अहिले मैले यो धर्मका बारेमा सबै ज्ञान बटुलिसकेकी छु । छोरीहरूले आमा–बुवामध्ये बढी कसलाई खोज्छन्?दुवै छोरीले असीमलाई नै खोज्छन् । ऊसँगै बढी मिल्छन्, मसँग अलि डराउँछन् ।हिजाब लगाएर कार्यक्रम चलाउनुको कारण ?इस्लामिक कोर्स गरेपछि मैले हिजाबको महत्व बुझें । त्यसैले मैले ३ वर्षदेखि हिजाब छोडेकी छैन । यसले मेरो कन्फिडेन्ट लेबल बढाएको छ । आफैलाई बोल्ड लाग्छ । धेरैले त्यस्तो राम्रो केश किन लुकाएको भनेर कमेन्ट पनि गर्छन्, तर म त्यसको वास्ता गर्दिनँ ।असीमदीपाञ्जलीका बारेमा केही भन्नुपर्दा ?मेरा हरेक कुरालाई आँखा चिम्लिएर साथ दिने जीवनसाथी । अहिलेसम्म केही कुराको गुनासो छैन, कुनै कमेन्ट पनि छैन ।बुद्धिष्टसँग विवाह गर्दा सम्बन्ध यसरी अघि बढ्लाजस्तो लागेको थियो ?पहिलो भेटमै मैले उनलाई राम्रोसँग बुझिसकेको थिएँ । यद्यपि उनी मैले बुझेभन्दा पनि बढी पारिवारिक निस्किन् । भान्साको काममा कत्तिको सघाउनुहुन्छ ?मलाई पकाउन त्यति आउँदैन । दीपाञ्जली भने खानभन्दा पकाउन रमाउँछिन् । छोरीहरूलाई कत्तिको समय दिनुहुन्छ ?शनिबार म कुनै पनि काम गर्दिन । त्यो दिन पूरै छोरीहरूकै लागि हो । उनीहरूको मुड र रुचिअनुसार बाहिर पनि लगिरहन्छु ।तपाईंको सफल वैवाहिक जीवनको रहस्य ?एक–अर्काको परिवारप्रति सम्मान, आपसी विश्वास, समझदारी एवं समर्पण ।

सिर्जना दुवाल श्रेष्ठ, पुस १९, २०७५

-- पुरै पढ्नुहोस् --

नगरपिताको प्रेमकहानी

दुई भारतीय राजघरानाकी नातिनी प्रतिमा त्यसरी भागेको माइती पक्षलाई पटक्कै मन परेको थिएन । सबैभन्दा धेरै कान्छी आमा विभुकुमारी रिसाएकी थिइन्, तर जति रिसाए पनि पाँच वर्षपछि भने माइतीको मन पग्लियो अनि बल्ल धवल–प्रतिमा त्रिपुरा खान्दानमा भित्र्याइए ।

जनक नेपाल, श्रावण ३१, २०७५

-- पुरै पढ्नुहोस् --

गुड लक विसले मिलाएको जोडी

डा. अनिल नेपाल आएका बेला उनीहरू भेटघाट गर्थे । त्यतिबेला घुम्न कतै टाढा जाँदा कसैले देख्ने हो कि भन्ने चिन्ता डा. अनिललाई हुन्थ्यो, त्यसैले उनीहरू नजिकैको रेस्टुराँमा पुग्थे । विवाह गर्ने समयमा मनीषाले शिक्षण अस्पतालको जागिर छोडिन् । अहिले मनीषा आफ्नी दुई वर्षीया छोरीको स्याहार गरेर दिन बिताउ“छिन् भने परिआएका बेला मोडर्न हर्ट क्लिनिकलाई समय दिन्छिन् ।

उपासना घिमिरे, असार ७, २०७५

-- पुरै पढ्नुहोस् --

इगो र इखलाई पर राखौं

समय–परिस्थितिअनुसार कुनै पनि कुरामा एकजनाले त कम्प्रोमाइज गर्नैपर्छ, त्यतिबेला मैले किन कम्प्रोमाइज गर्ने, तिमी नै गर भन्ने जस्ता कुराले पनि सम्बन्ध बिग्रन्छ भने इगो र इखलाई वैवाहिक सम्बन्धबीच ल्याउनु हुँदैन ।

नारी संवाददाता , चैत्र ९, २०७४

-- पुरै पढ्नुहोस् --

विना संघर्ष मिलेको जोडी

संगीतप्रतिको रुचिबाहेक अरू सबै अपोजिट छन् । म घुम्न, फिल्म हेर्न तथा सपिङ गर्न रुचाउँछु तर उहाँलाई यी कुरामा पटक्कै रुचि छैन । म धेरै बोल्छु भने उहाँ कम बोल्नुहुन्छ ।

नारी संवाददाता , चैत्र ८, २०७४

-- पुरै पढ्नुहोस् --

साइबरले जोडेको ज्ञानेन्द्र र संगीता को जोडी

अलि रिजर्ब खालकी छिन् । खाना मीठो भएन भने खाँदै खान्नन् । मलाई भने खाना खेर फाल्ने बानी मनपर्दैन ।

नारी संवाददाता , चैत्र ७, २०७४

-- पुरै पढ्नुहोस् --

क्रियटिभ जोडि

हामी हरेक दिन सिक्ने प्रयासमा हुन्छौं । त्यसैले हामी आफूलाई सिकारुका रूपमा लिन्छौं साथै हामी भित्रैबाट हाँस्छौं, हामीलाई संसारको नम्बर वान हुनु छैन । हामी आफ्नो सन्तुष्टि र खुसीमा विश्वास राख्छौं । हामी कुनै पनि काम प्रेसरमा गर्दैनौं ।

सिर्जना दुवाल श्रेष्ठ, फाल्गुन १८, २०७४

-- पुरै पढ्नुहोस् --

विपरीत रुचिमा रमाएको जोडी मेघा र पारस

४–५ वर्षको रिलेसनपछि घरमा आ–आफ्नो जातअनुसारको विवाहको कुरा आउन थालेपछि उनीहरूले आपसी सम्बन्धका बारेमा परिवारलाई जानकारी दिए जुन कुरा सुनेर उनीहरूका परिवारका सदस्यहरू अचम्ममा परे । उनीहरू संगीत प्राक्टिसका क्रममा भेट्ने कुरा परिवारलाई थाहा थियो तर विवाह गर्नेसम्मको सम्बन्ध भनेर कसैलाई जानकारी थिएन ।

सिर्जना दुवाल श्रेष्ठ, माघ १६, २०७४

-- पुरै पढ्नुहोस् --

एक–अर्काको प्रेममा मग्न मल्होत्रा जोडी

अध्ययन पूरा गरी दिकेश नेपाल आएपछि जेनिशा र दिकेश दुवैले इन्टर्नसीपका लागि सामसुङमा सँगै काम गरे । कामलाई महत्व दिने उनीहरू एमबीए पढ्न सँगै बेलायत गए । एक वर्ष सँगै बस्दा एका–अर्कासँग नजिकिन र एक–अर्कालाई बुझ्न अझ सजिलो भयो । उनीहरूको अफेयरको हल्ला दुवैको घरमा पनि पुगिसकेको थियो ।

सिर्जना दुवाल श्रेष्ठ, पुस २३, २०७४

-- पुरै पढ्नुहोस् --

बाइक राइडर जोडी दीपेश र मेरिना

दीपेशसँग मोटर स्पोट्र्सको अनुभव एवं ज्ञान छ भने मेरिनासँग सिर्जनशीलता, उत्साह एवं जाँगर छ । यसरी दुवैका गुणहरू मिले भने आफ्नो क्षेत्रलाई अझ धेरै कुरा दिन सकिन्छ भन्ने सोचका कारण आफूहरूले एक–अर्कालाई चुनेको उनीहरू बताउँछन् । एउटै क्षेत्रको हुँदा एकले अर्काेलाई बुझ्न, एक–अर्काको कामलाई सहयोग गर्न धेरै सहयोग पुग्ने मेरिनाको अनुभव छ ।

सिर्जना दुवाल श्रेष्ठ, मंसिर २४, २०७४

-- पुरै पढ्नुहोस् --

पाइलट जोडी

एउटै क्षेत्रको भएकाले कामको मर्म बुझ्न सजिलो भएको अनुभव छ । उनीहरूले भारतको टुर जंग कम्पनीमा ७ महिना क्याप्टेनका रूपमा काम गरेका छन् ।

सिर्जना दुवाल श्रेष्ठ, मंसिर २२, २०७४

-- पुरै पढ्नुहोस् --